თბილისში შშმ პირებისთვის ადაპტირებული ტაქსები დაიწყებს ოპერირებას
დედაქალაქში მნიშვნელოვანი, პროექტი განხორცილედება, რომელიც შშმ პირებისთვის ადაპტირებულ ტაქსებს გულისხმობს. ამ დრომდე ტაქსით სარგებლობა განსაკუთრებული შესაძლებლობის მქონე პირთათვის დიდი გამოწვევა იყო. „გვინდა, რომ განვითარებული ქვეყნების მსგავსად, სადაც შშმ პირთათვის სპეციალური ტაქსები არსებობს, აღნიშნული სერვისი თბილისშიც დაინერგოს“ - განაცხადა დედაქალაქის მერმა.
თბილისის მერმა ვიცე-მერს, ირაკლი ხმალაძეს დაავალა, აღნიშნული სერვისის დასანერგად მოლაპარაკებები დაიწყოს ტაქსის იმ კომპანიებთან, რომლებიც თბილისში ოპერირებენ.
„სატრანსპორტო პოლიტიკის ერთ-ერთი მთავარი მიმართულება იყო ტაქსების რეფორმა, რომელიც დავიწყეთ და ბევრი კარგი საქმე გაკეთდა. საზოგადოებრივი ტრანსპორტი შშმ პირთათვის ყველანაირად ადაპტირებულია, რათა მათ გადაადგილება უპრობლემოდ შეძლონ. დღეს დედაქალაქში ბევრი კომპანიაა,
რომლებიც ტაქსების მიმართულებით მუშაობენ. მინდა, დავავალო ვიცე-მერს, ირაკლი ხმალაძეს, რომ მათ დაველაპარაკოთ, ვთხოვოთ, რომ შესაბამისი აღჭურვილობის მანქანები შემოიყვანონ, რათა შშმ პირებს თავისუფლად შეეძლოთ გადაადგილება, სპეციალური აღჭურვილობის მქონე ტაქსის სერვისით სარგებლობა. ვერ ვხედავ პრობლემას, რომ მსგავსი ტიპის მანქანების შემოყვანა ვერ შეძლონ.
ამიტომ, დაველაპარაკოთ მათ“, – განაცხადა კახა კალაძემ.
