26 მაისს საქართველო დამოუკიდებლობის დღეს აღნიშნავს – ისტორიული დღე, რომელსაც მთელი ქვეყანა განსაკუთრებულად ზეიმობს
26 მაისი ჩვენი ქვეყნის ისტორიაში განსაკუთრებული თარიღია, დღეს საქართველო დამოუკიდებლობის დღეს აღნიშნავს! საზეიმო ღონისძიება მთელი ქვეყნის მასშტაბით გაიმართა, წვევამდელების ფიცის დადების საზეიმო ცერემონია წელს ერთდროულად 5 ლოკაციაზე გაიმართა. ღონისძიების ცერემონიალზე სიტყვით მიმართეს ქვეყნის პირველმა პირებმა, გაჟღერდა საქართველოს ჰიმნი. ნახეთ ფოტორეპორტაჟი, დედაქალაქის ცენტრიდან, სადაც დღესასწაული გვიანობამდე გაგრძელდება.
1918 წლის 26 მაისს საქართველოს ეროვნულმა საბჭომ მიიღო სახელმწიფოებრივი დამოუკიდებლობის აქტი და ჩამოაყალიბა დამოუკიდებელი საქართველოს მთავრობა. სახელმწიფოს პოლიტიკური მმართველობის ფორმად აღიარეს დემოკრატიული რესპუბლიკა; შეიქმნა ევროპული ტიპის ქართული სახელმწიფოებრიობა, დემოკრატიული სისტემა.
საქართველოს დამოუკიდებლობას იმთავითვე მტრულად შეხვდა ბოლშევიკური რეჟიმი, რომლის მიზანს წარმოადგენდა რუსეთის ყოფილი იმპერიის აღდგენა. 1921 წელს საქართველოში წითელი არმია შემოიჭრა და ქვეყნის ანექსია მოახდინა. საქართველოს მთავრობა და დამფუძნებელი კრების უმრავლესობა ემიგრაციაში წავიდა.
1991 წლის 31 მარტის საყოველთაო რეფერენდუმის შედეგად, მოსახლეობის ერთსულოვანი გადაწყვეტილებით, ქვეყანამ დამოუკიდებელი რესპუბლიკის სტატუსი დაიბრუნა. 1991 წლის 9 აპრილს ძალაში შევიდა საქართველოს სახელმწიფოებრივი დამოუკიდებლობის აღდგენის აქტი.
