როდის დაიწყება რუსთაველის გამზირის რეაბილიტაცია?
ამის შესახებ მედიას თბილისის მერის მოადგილემ, ირაკლი ბენდელიანმა განუცხადა.
მისი თქმით, დედაქალაქში გამზირების რეაბილიტაციის პროექტები გეგმის მიხედვით მიდის და რუსთაველზე სამუშაოები, სავარაუდოდ, მომავალი წლიდან დაიწყება.
„ვინც მაგ მიმართულებით გადაადგილდება, უკვე ნათლად ხედავს, რა მდგომარეობაშია ასფალტის საფარი, ტროტუარები არის მოსაწესრიგებელი, უამრავი საჰაერო სადენებია, რომელიც ვიზუალურად ძალიან ამახინჯებს ტერიტორიას.
თუმცა გამზირების რეაბილიტაციაზე როდესაც ვსაუბრობთ, ერთდროულად შეუძლებელია ყველა პროექტის დაწყება ფინანსებიდან გამომდინარე. წერეთელთან ერთად რომ დაგვეწყო რუსთაველის და, პირობითად, ვაჟა-ფშაველას გამზირების რეაბილიტაცია, სრული სატრანსპორტო კოლაფსი გვექნებოდა ქალაქში. ამიტომ ყველა ეს პროექტი ხორციელდება გეგმის მიხედვით. მომავალ წელს ვფიქრობთ, რომ დავიწყოთ რუსთაველი“, – ამბობს ირაკლი ბენდელიანი.
ცნობისთვის, დედაქალაქის მერმა, კახა კალაძემ, რუსთაველის გამზირის რეაბილიტაცია რამდენიმე კვირის წინ დააანონსა: „მიწისქვეშა კომუნიკაციები მოუწესრიგებელია. ბევრჯერ იყო შემთხვევა, რომ ამის გამო კონკრეტულ ადგილებში მიწა ჩავარდა. რა თქმა უნდა, რუსთაველის გამზირსაც სრულ რეაბილიტაციას ჩავუტარებთ“.
