რამ გამოიწვია მცხეთასთან რამდენიმე კილომეტრიანი საცობი და რა განმარტებას აკეთებს საავტომობილო გზების დეპარტამენტი
რამდენიმე კილომეტრიანმა საცობმა მცხეთასთან, მოქალაქეებს პრობლემები შეუქმნა. საავტომობილო გზების დეპარტამენტმა კი აღნიშნულზე განცხადება გაავრცელა, უწყების ცნობით, აღმოსავლეთ დასავლეთის ჩქაროსნული მაგისტრალის 26-ე კილომეტრზე მდებარე ხიდზე დაზიანებული ხიდის კონსტრუქციული ნაწილის აღდგენა მიმდინარეობს და ის მიმდინარე კვირაში დასრულდება.
“მიმდინარე წლის 21 მარტს, საქართველოს საავტომობილო გზების დეპარტამენტმა გაავრცელა განცხადება, სადაც მოსახლეობას მიაწოდა ინფორმაცია, რომ მდინარე არაგვის ხიდზე (მარცხენა მიმართულება), დაზიანდა კონსტრუქციული ნაწილი და საჭიროებდა აღდგენას, ხოლო სამუშაოებიდან გამომდინარე აღნიშნულ მონაკვეთზე საორიენტაციოდ ერთ სამოძრაო ზოლზე, დასავლეთ-აღმოსავლეთის მიმართულებაზე, მოძრაობა შეიზღუდებოდა.
გავრცელებული ინფორმაცია, იმის შესახებ, რომ თითქოს სამუშაოები მიტოვებულია და დროის მცირე პერიოდში შესაძლებელი იყო აღნიშნული სამუშაოები დასრულება არ შეესაბამება სინამდვილეს.
გუშინ, ობიექტზე არ იმყოფებოდა მუშა პერსონალი, რადგან მიმდინარეობს. ბეტონის შესაბამისი სიმტკიცის მიღების პროცესი, რის შემდეგაც ხიდის სავალ ნაწილზე დაიგება ასფალტ-ბეტონის საფარი და შეზღუდულ ზოლზე მოძრაობა გაიხსნება.
აღსანიშნავია, რომ აღნიშნული ხიდი აშენებულია გასული საუკუნის 70-იან წლებში, ლითონის მალის ნაშენზე დამონტაჟებულია რკინაბეტონის ფილები და მოწყობილია ასფალტ-ბეტონის საფარი. შესაბამისად, პერიოდულად ზიანდება ფილა, რაც შემდგომ საჭიროებს რკინაბეტონის სავალი ნაწილის ფილების დაზიანებული ფრაგმენტების დაშლას, ქარგილის მოწყობას, დაზიანებული ფილების კონსტრუქციების არმატურით გაძლიერებას და მაღალი სიმტკიცის ბეტონით შევსებას,”- ნათქვამია უწყების მიერ გავრცელებულ ინფორმაციაში.
